Wiraquchapampa (Q'iru)

Wiraquchapampa (Wiraqochapampa) nisqaqa Q'irus ayllu llaqta ñiqpi (Pawqartampu distritupi) huk puystum. Q'irus runakunaqa urqup apunkunap ispañulkunata atisqanmanta willakunmi.

Kastilla Atiy pachapi chay ispañul awqaqkunaqa Inkarrita atirqaspa tukuy Tawantinsuyuta hap'iykachaspa tukuy Inka runakunata wañuchinayaspa qhipaq puchuq inkakunatas Awsanqati k'itiman, Q'irusmansi qatisqa. Chayta rikuspas Apu Awsanqati huk urqukunap apunkunawanqa ninakusqa, ispañulkunata wañuchispa hark'asunchik, nispa. Ispañul wiraquchakuna Wiraquchapampaman chayamuptinsi apukuna rumikunata achka allpatapas chamqaspa lluqllatas qallarichisqa. Hinaspas kawsaqraq inkakunas ayqispa Q'irus llaqtata kamarispa qispichikurqan. Kunan Q'irus runakunaqa inkakunap churinkunas.