Chunkantin Kamachiykuna

Chunkantin kamachiykuna, iwriyu simipi qillqasqa, Jekuthiel Sofer, 1768 watapi.

Chunkantin kamachiykuna nisqaqa (iwriyu simipi: עשרת הדיברות, grigu simipi: Δεκάλογος [Dekálogos]) hudyu iñiypi, kristiyanu iñiypipas, Torakama, Ñawpa Rimanakuy nisqa qillqasqakama Moshe sutiyuq runaman Sinay urqupi Dyuspa kamachisqankunam.

Chay kamachiykunaqa hudyukunap, kristiyanukunap tiksi kamachiykunam kawsanakunapaq.

Dyuspa Simin Qillqapiqa Exodus (Mitikuy) nisqa qillqapim nin (2ñ Moyses (Exodus) 20:2-17 ):

(1) Dyusqa kay tukuyta rimaspa ñirqan:

1. (2) Ñuqam Apuyki Tayta Dyus kani; Egiptomanta hurqumurqayki, wata runallapuni kasqaykimanta. (3) Ñuqamanta hawaqa wak dyusniyki ama kachunchu. (4) Ama ima lantitapas rurakunkichu, imaman rikch'akuqtapas, hanaq pachapi, kay pachapi, amataq allpap ukhunpi yakupi kaqman rikch'akuqtapas. (5) Ama qunqurikunkichu chaykunaman, amataq yupaychankichu. Imaraykuchus ñuqam Apuyki Tayta Dyus kani sinchi, qhusqu Dyus. Taytakunap huchallikusqanmantam wanachasaqpuni churinkunata willkankunatapas kimsa ñiqin miraykunakama, tawa ñiqin miraykunakamapas. (6) Ichaqa khuyawaspa, kamachikusqaykunata uyarikuq runakunata waranqantin mirayninkamam khuyapayasaq.
2. (7) Ama qasi mana kaqta huqarinkichu Apuyki Tayta Dyuspa sutinta; Tayta Dyusqa manam saqinqachu Dyuspa sutin qasimanta huqarikuqta mana wanayniyuq.
3. (8) Ama qunqankichu samarikuna p'unchayta Dyusniykipaq t'aqapuyta. (9) Suqta p'unchawta llamk'anki, chay p'unchawpitaq tukuy ruranayki kaqta ruray. (10) Qanchis kaq p'unchawri samarikuna p'unchaw kanqa, Apuyki Tayta Dyuspaq t'aqasqa. Chay p'unchawpi ama imatapas rurankichu. (11) Tayta Dyuspas suqta p'unchawpi rurarqan hanaq pachata, kay pachata, mama quchata, chay rurasqankunapi tukuy ima kaqkunatapas. Qanchis kaq p'unchawpitaq samarikurqa. Chayrayku Tayta Dyusqa samarikuna p'unchawta saminchaspa ñirqan, payllapaq t'aqasqa kasqanta.
4. (12) Taytaykita mamaykitawan hatunpaq qhaway, chay hinapi Apuyki Tayta Dyuspa qunan allpapi unayta kawsanaykipaq.
5. (13) Ama wañuchinkichu runa masiykita.
6. (14) Ama khuchichakunkichu kasarakusqaykita wasanchaspa.
7. (15) Ama suwakunkichu.
8. (16) Ama runa masiykip hayunta llullakuspa rimankichu.
9. (17) Ama munapayankichu runa masiykip wasinta;
10. ama munapayankichu runa masiykip warmintapas, [qusantapas], qhari kamachintapas, warmi kamachintapas, wakantapas [buwisnintapas], asnuntapas, amataq ima kaqtapas.

Hawa t'inkikuna

• Runasimi.de: Chunka kamachiykuna (Exodus 20:1-17) - achka hina t'ikrasqakuna, Chunka kamachiykuna (katisismu nisqamanta)
• Quechuas.net / Aschmann: Chunkantin Kamachikuykuna (Chanka runasimipi)
• Chunka Bibliapi Kamachikuykuna, Chunka Católica Kamachiykuna
• Chunkantin Kamachiykuna, Exodus 20:2-17, bible.is nisqapi:
  • Chunkantin Kamachiykuna (Qosqo qheswa simipi)
  • Chunkantin Kamachiykuna (Urin Buliwya qhichwa simipi)
• Chunkantin Kamachiykuna, Exodus 20:2-17, bibles.org nisqapi:
  • Chunkantin Kamachiykuna (Ayakuchu Chanka runasimipi)